ورطة .. ياهي ورطة .. ويا الترانزيت

هالترانزيت .. هلااااك

نزلت في مطار الدوحة .. طبعا عقب تأخير الطيارة لأكثر من ساعة

يوم نزلت الدوحة .. بسرعة بسرعة سرت أسأل عن الطيارة الثانية

لكن للأسف .. طارت الطيارة ؟؟؟   رحنا فيها

الوقت متأخر .. تقريبا كان الساعة  2 وشوي في الليل طبعا

سرت أسألهم عن تغيير التذكره للطياره الياية

فوقفت في الطابور .. لأنه عدد من الناس كانوا يبغون يسوون نفس الحركة .. لوجهات مختلفة

وحصلت واحد من سلطنة عمان

كان يبغي يسير مانشستر .. بيودي ولده للعلاج

ومسكين عنده موعد

وبسبب تأخر الطيارة في مطار بوظبي ..  بيتأخر عن موعد المستشفى أتوقع .. يوم كامل .. اذا ما كان اكثر .. الله يعين بس

المهم يلست اتريا دوري .. وعيزت من الوقفه .. لأنه اللي كان يستلم التذاكر ويحولها .. واااايد يتكلم

وما أبالغ إذا قلتلكم إني وقفت أنتظر حوالي ساعة إلا ثلث .. لا وآخر شي .. ما أدري وين سار ؟؟

فعطيت اللي يالس في الكونت الثاني .. وما كمل إلا ثلاث دقايق تقريبا .. وعطاني التذكرة

وانصدمت .. إنه إقرب طيارة .. كانت في الساعة 8:35

الصبح

والمفروض إني أوصل سيلان الساعة 8:10 الصبح

يالله الحمدلله على كل حال

إنرين هذا معناته إني بيلس في المطار أكثر من 7 ساعات .. انتظر الطيارة الياية

المطار كان فيه شوية ناس .. اللي منسدح وراقد .. واللي مركب السماعات في الكمبيوتر .. واللي على النت .. فقلت خلني اشغل الكمبيوتر .. و ءشوف  .. هل فيه انترنت ولا لا

يلست قريب من  التيلفونات المعلقة .. لأنه تحتها مكان أقدر أوصل فيه الكهربه للكمبيوتر

شغلت النت .. اشوف الايميل .. فشفت رد من الاخت اليماحي

فرديت على التعليق

وبفيت أسوي شي .. اكتب .. أصمم شي .. لكن كان الرقاد أقوى منّي  .. حاولت أقاوم .. لكن للأسف

فقلت أرسل مسج .. لبومحمد .. لأنهم ينتظروني هناك على أساس الصبح

فأرسلت مسج .. وصراحة المسج تنقيع

لأني أبدا أكتب .. وفي نص الكلام .. أغمض عيوني من التعب

فيوم افتح اشوف  اني كتبت خرابيط .. فأمسح .. وأبغي أتذكر شو كنت ابفي أكتب

شوي وأتذكر .. وأرجع أكتب مره ثانيه .. لكن أعاود وأغمض وأخربط في الكتابة

…. يمكن ثلاث مرات .. وأنا اسوي نفس الحركة .. وحتى ارسلت رسالة وفيها تنقيع

المهم .. قلت خلني ادور مكان يمكن اقدر انسدح على كرسي طويل ولا شي .. فما حصلت

فتميت امشي .. لين ما حصلت لافته .. ك؛توب عليها .. غرف للراحة اتوقع

فسرت هناك .. مثل غرفة .. لكن مظلمه .. ما ادري شو داخلها

فقربت من الزجاج اشوف .. الا وفيها مثل هالكراسي الطويله .. والناس كرقدين عليها

فما عيبني الوضع ..  ورجعت عقبها رديت مكان .. وشغلت الكمبيوتر .. لكن النوم كان أسرع من النت

فحاولت أتغلب على النوم .. ما قدرت .. أغمض .. وأرد أفتح .. أغمض …. فعقب أشوف الساعة // الا والفجر ما باقي عنه شي

قلت حلو .. خلني أسير أتوضا .. واسير المسيد للصلاة

يوم دخلت المسيد .. كالعادة لازم نشوف ناس راقدين  .. اللي متساند على الشنطة ماله

واللي راقد وريوله باتجاه القبلة .. واللي يناااااخر .. ومسوي إزعاج

وفي نفس الوقت اسمع .. حد يقرا قرآن .. يوم لفيت راسي .. ادوّر .. الا وأشوف جماعة من 3 أشخاص

فالتحقت وياهم .. وكانوا مجموعة من عمال النظافة .. وما شاء الله على الامام .. مش عربي .. لكن قرايته .. طيبه

عفب الصلاة .. يلست أتلفّت .. قلت بحصل مكان انخمد فيه ؟؟؟!!!؟   لكن تفريبا المسيد ..مترووووس من النائمين .. وليس المصلين .. خخخ

طلعت من المسيد .. و رجعت أدور مكان اريّح فيه .. لكن ما شاء الله .. المطار ثار فيه حركة أكثر من قبل .. شو السالفة ..  المهم .. انا اتذكرت انهم عطوني ،، كوبون لوجبة .. فرحت أسأل وين مكان هالمطعم

وآخر شي دلّوني وين مكانه .. وماشاء الله .. طابور طويييل

قلت اذا ما وقفت الحين .. متى بقف .. لأنه كل ما ياه وزيد عدد الناس

فوقفت وياهم ،، انتظر الدور .. ويلست أتفحص الناس .. معظم الموجودين من الاجانب ،، والافارقة  .. وغيرها من الجنسيات الغير عربية .. وما حصلت إلا عايله وحده من قطر ؟؟!!

عالعموم .. انتظرت لين ما يا دوري .. خذتلي ،، صحن وفيه بطاطا .. وحبة كرواسون .. عصير أو حليب بالهمبا ( المانجا) على قولتكم

يلس في طاولة .. بروحي .. محّد وياي .. وخلصت أكلي …  والحمدلله

عقبها قلت ارجع من وين ما ييت لأنه قام المطار يزدحم

سرت هناك .. وبصراحة اختلاف كبير .. عن وضعه الحين ،، وعن قبل الصلاة

المهم يلست .. انتظر .. فطلعت الكمبيوتر.. على اساس اوّني صحصحت من عقب الصلاة .. وعقب الوجبه الخفيفة .. لكن ما كملت 5 دقيايق .. تزيد أو تنقص .. إلا والعين بدت  تحاول إنها تغمض .. حاولت أقاوم

أفرك عيوني .. أتمتح .. أحاول أنشّط نفسي .. عشان يروح الرقاد

لكن  ما قدرت .. رديت الكمبيوتر في الشنطة .. واغفلت شوي .. لمن ما واحاله .. الا والمطار انترس .. وفيه وفد اجانب .. شكلهم طلبه وطالبات .. يلسوا ويانا .. حاولت اعرف شو لغته او من وين هم .. بس ما عرفت .. ما يتكلمون بالانجليزي ولا الفرنسي .. ما يقولون .. غ ..  ،،ولا أنهم ألمان .. لأنهم ما يقولون .. خ ..  فما عرفت بصراحة

المهم .. ويا حشرة الناس .. شوي  الا واتذكرت اني يايب دفتر رسم

فيلست .. اشخبط شوي .. وأرسم .. والحمدلله بدأ الرقاد يروح شوي شوي

لين ما فتحوا الباب .. عشان يطرون التذكرة .. ونسير تحت .. عشان نركب الباص

لكن ما رفعت راسي . الا والطابور استوى أفعى .. ما كفاه المكان .. فالتلف .. قلت في نفسي .. هالعدد كلّه .. وبتم واقف .. حلني ايلس .. ويوم بيخف بوفق وياهم

فسرت ويلست في الكراسي المجابله المدخل .. وتميت اتريا .. واتريا .. وشوي الاشخاص الي كنت وياهم .. وصولوا عند المدخل .. ودخلوا .. لكن الطابور طوييييل وما يخلص ؟؟١!

عيزت وانا انتظر

لكن شو بسوي .. انتظر وأمري لله

يلست حوالي  قريب الساعة وانا انتظر

وعقب خف العدد بشكل كبير ،، فقمت ووقفت في الطابور .. ودخلت عندهم ،، عديت .. نزلت تحت وركبنا الباص .. وانتظرنا لين ما اكتمل العدد .. ومشى الباص .. وايح باتجاه الطيارة

انا اتوقعت انه الطيارة قريبه ؟؟؟  لكن تم الباص يمشي ،، ويمشي .. وطلع برّع المطار .. ما ادري كيف .. المهم وتم يمشي في الدرب ،، ورجع مره ثاني ودخل  .. ومشابنا لين ما وصلنا الطيارة

ركبنا الطيارة .. والحمدلله .. وكنت طول الفتره أدعي انه ما ييلس معاي الا حد مسلم .. او ياهل حتى لو كان من هالاجانب … دخلت الطيارة .. وحطيت اغراضي فوق .. ويلست انتظر ،، منوه الضيق اللي بيكون يالس معاي … انتظر .. وانتظرت ،، والناس يدخلون ويروحون .. واييون .. لين ما يا المضيف ويأشر لشخص انه هذا مكانك .. اللي هو عندي  .. الله يعين منوه هذا ؟؟

واااااااااااااا

طلع اللي كنت خايف انه يستوي .. واحد من شكله هندي .. ومب مسلم .. ويبين من الذهب اللي لابسنه

يالله … امري لله .. شو بسوي بعد

يلس هو عند الدريشه .. وانا عند الممر .. بصراحة كم طول الانتظار .. والطيارة ما ادوي شو سالفتها .. شو يتريون ؟؟  ما ادري

فمن التعب .. رقدت … لا حسيت انهم اقلعوا .. لا في المره الاولى ولا الثانيه … وصراحة اول مره يستويلي هالشي ؟؟

فما وعيت .. الا والمضيف جداوم ويهي ؟؟ بسم الله شو السالفة

ثرها تسألني .. شو تبغي .. دياي ولا أومليت ؟؟

وأنا في خاطري .. دياي عالصبح ؟؟

المهم طلبت أوومليت … وكلت والحمدلله .. وبغيت اشوف شي من الدريشة .. ما قدرت بصراحة .. لأنه اشعة الشمس ما تخليك تشوف شي .. انا عاد ،،  شغلت الشاشة اللي جدامي .. ابفي اشوف الخريطة .. وكم باقي .. فشفتها وكانت درجة الحرارة الخارجية

-54

يالله .. في هالحالة اللي يطلع ايده .. او اي جزء من جسمه .. عادي يتجمد .. وينقطع .. المهم أنا عندي هاللحاف .. تلحفت فيه وانخمدت .. لكن تعرفون رقاد الطيارة .. يكسّر الواحد .. فما ارتحت من الكرسي .. لكن غصبن عني .. وفي الرقاد .. ما اذكر هل حلمت شي ولا لا ،، الله العالم

المهم .. رقدت .. وشوي اقوم .. وعلى هالمنوال .. لين ما سمعت  المضيفه او اللي ماسكه المكرفون تقول اربطوا الاحزمه .. واعدلوا الكرسي استعداداً للهبوط

فنزلنا والحمدلله ..  واللي كان راقد نش من رقاده .. واللي شعره ناجز .. ومكشش .. وانا وياهم بعد .. عن الفضايح بس ..خخخ

انا عاد .. على طول اتصلت في الشخص اللي بيستقبلني .. اسمه حسن

فقال انه فيه سايق ينتظرني في المطار .. وبعدها بنروح هند حسن

نزلت من الطيارة .. وسرت كتبت بعض المعلومات في ورقة لازم احطها مع الجواز

خلصتها .. وختمت الجواز .. سرت ادور المكان اللي اطلع منه خارج المطار .. لين ما وصلت عند مال الجمارك .. ( تفتيش الشنط ) .. فأشر لي  .. من بين الناس كلهم .. هات الشنطه ..يبون يشوفون شوفيها

انزين والاجانب .. يطوفونهم .. عادي ولا وقفوا واحد منهم

المهم .. بدأ ينبش و يسأل .. شوحاط في الشنطة .. يعني شوبعد .. واحد مسافر .. شو بيحط اكيد ثيابه وحاجات شخصية .. مشط .. عطر …. الخ

وهو يفتش .. يسأل ،، وانا اجاوبه ،، لين ما قال .. ليش ياي سيلان . عند جير فرند ؟؟!!

أنا في خاطري اقول شو هالغبي .. يدري اني ياي من بوظبي .. ما بحصل جيرفرند الا عندكم في سيلان ؟؟  صدق انك عبيط .. والظاهر والله العالم انه خبيث .. لأنه يالس ينوّه ليش … فقلت له انا متزوج اصلا  .. على العموم .. هو يالس يسأل و يتفلسف .. عشان أعطيه شي .. على قولتهم بخشيش

وانا ما سويتله سالفة … أخر شي شاف ما شي فايده .. وميشيت عنه .. طلعت من هناك ودقيت على رقم الدريول اللي ينتظرني .. وانا اشوف الناس اللي ينتظرون .. اللي شال لافته واللي يسأل واللي ….الخ فيوم رد عالتيلفون .. يلست اكلمه .. فلمحته من ببنهم

فقلتله .. شفتك والحين ياينك .. وصلت عنده وسلمت عليه .. وطلعنا من المطار .. فقال بتنتظر هنيه ؟؟ فقلت ليش؟؟ .. قال الباص بعيد شوي .. لأنه ماشي مواقف قريبه.. فقلت عادي بمشي

المهم .. مشينا لين الباص .. فتح الباب اللي ورا .. وحطيت الاغراض .. وعفب درت حول الباص عشان اركب جدام .. فهو استغرب مني .. ليش ياي هنيه .. وفتح الباب .. وأنا يلس أقول ليش هو مستغرب مني ..  لكن من فتح الباب .. انتبهت انه السيارات والباصات .. سكّانها في جهة اليمين

المهم ركبت وياه .. وتحركنا بنسير كولومبو .. بصراحة انا اتوقعت انه شوارعهم مكسره .. ورمله .. وجيه يعني .. لكن عندهم شوارع بصراحة .. لكنها مزدحمة .. وهذا السبب اللي يخلّي من طريق الربع ساعة إلى ساعة كامله مثلا .. المهم نحن سرنا في هالدرب .. عشان توصل عند (حسن) اللي كان بيستقبلني في المطار .. لكن بسبب تأخر وصولي رجع لكولومبو

عاد في الدرب .. تشوف حياتهم اليومية .. اللي يسوق السيكل .. واللي سيارة عادية .. أو شاحنة مثلا .. ولفت انتباهي .. التك تك .. هي اساسا دراجة لكن مسوينها على شكل السيارة

وهي بمثابة التكسي .. طبعا السايق جدّام .. واثنين من الرّكاب ورا

وبصراحة لفت انتباهي اكثر .. انه على الزحمة هاي .. وانه هذا ايي جدامك .. وهذا يلف من السيد الثاني عليك .. لكن ما تشوف حوادث

حياة بسيطه .. والأجواء حلوه .. مشينا في بين القرى والبيوت .. لين ما وصلنا المنطقة اللي فيها (حسن)  وهني بدأ السايق .. يمشي ويتلفّت .. ويدوّر يمكن مشينا هناك مال ربع ساعة لين ما وصلنا  عند (حسن ) .. فاستقبلني واحد اسمه (بشير )  وسألني إذا أبغي شي قبل ما نتحرك .. فقلتله .. ماصليت الظهر والعصر .. فدخلني غرفه .. وهناك تكرمون دورة مياه .. فتوضيت .. وصلّيت الظهر والعصر جمع تأخير .. ويوم خلّصت قال ننتظر الاخ حسن .. فيلست اسولف وياه

لين ما يانا حسن .. فقال الحين ما بقى شي عن المغرب .. عشان الصلاة يعني .. فقال انا رايي نصلّي وبعدين نتحرك ..

رحنا فوق عندهم .. تقريبا فوق السطح .. وفيه عندهم مثل مدرسه دينيه او اسلاميه .. وكان عندهم واحد يعلمهم شي .. ما ادري شو يقول بصراحة

فيوم خلّصوا الصلاة .. يا وسلّم عليه .. وكلمني بالعربي

سأل من وين ..؟؟ فقلت له من الامارات ،، فقال انا كنت اشتغل هربع سنوات.. في  (كلبا)  وسمّالي كم اسم من هناك .. فقلت له عاد انا في ابوظبي .. وما اروح هناك الّا نادراِ .. يمكن مرتين سرت .. فقط

صلينا المغرب والعشاء .. وجدّموني اصلي فيهم .. وكان حجّته .. اني مسافر .. فقلت له انا بصلي المغرب ومافيه (قصر ) للمغرب .. فما رضى الا اني اصلّي فيهم

المهم .. صلّينا المغرب .. وعقبها صلّيت العشاء … وبعدين تحركنا في طريقنا

سألته كم المسافة ؟؟

فقال : 160  كيلو او اقل او اكثر .. ما اذكر بالضبط .. فقلت في خاطري .. يعني من بوظبي لين العين

يعني مال ساعة ونص .. خلنا نقول ساعتين .. لكن صدمني يوم قال تستغرق الرحلة لين هناك .. حوالي 5 ساعات ؟؟؟   واااابوك .. وكان السبب انه الشاركة سيدرونسيد + صعود المناطق الجبلية .. يقول  2000 متر  ارتفاعها

الله يعني .. المهم ركبنا الباص السايق وحسن .. واثنين بينزلون في الدرب  .. انا بصراحة تساندت على الشنطة .. ورقدت .. وحتى انه الشخصين اللي كانوا معانا نزلوا وانا ما حسيت فيهم .. مشينا في الظلاااام .. بين المزارع والمرتفعات سايرين مدينة ( نورالي ) .. اللي هي بالعربي ( نور علي )

المهم .. مشينا تقريبا ساعتين .. وبعدين وقفنا نتعشّا ،، فنزل هو المطعم يتأكد،، لأنه وايد من المطاعم .. مش مسلمين .. وأكلهم مش حلال

فما خذنا شي من عندهم ..،  وتحركنا مسافة مب قصيره .. ندور مطم .. حتى اذكر سأالني شو تحب تاكل .. فقلتله .. ما عندي مشكله ،، حتى لو باراتا مع بيض ،، ولا شي جيه .. فمشينا مسافه لين ما وصلنا مطعم ..فيه مسلمين نزلنا هناك وطلبا باراتا + عدس

وكان العدس فيه فلفل ،، وانا ما اتحمل الفلفل .. لكن يالله .. اليوع ما يخلي حد في حاله

وعقب ياب بيض بالطماط والبصل .. مثل الاووومليت

وبس صراحة باراتا فررششش

احلى من اللي عندنا بواااايد

تعشينا والحمدلله .. وعقب العشا تحركنا نكمّل الدرب اللي باقي .. وكان باقي تقريبا 3 ساعات

فأنا على طول حطيت راسي ،، وانخمدت

وما وعيت الا والباص توقّف ؟؟ شو السالفة ؟؟

بسم الله الرحمن الرحيم .. لا وبعد بنّد الباص .. وحسن نزل من الباص وعلى يسارما باب خشبي

شو ها حسن .. وصلنا ؟؟ قال نعم هذا هو الفندق

طبعا جدامنا سواد .. وعلى اليمين نفس الشي ،،، وزجاج الباص مرطّب ؟؟ طلع كان في مطر في الدرب

وانا ولا ادري بالسالفة

المهم .. وصلنا الفندق ،، ودخلت الغرفة .. ازعجنا بو محمد ،، وعيناه من النوم

ومساكين . مخليلي عشا .. لكن لين الحين ما كلته

لأني ما احب اكل وعقبها ارقد

خاصة اني وصلت هناك على الساعة وحده وشي ..

فكان من بين الاكل .. يح + فيفاي أو الباباي

فكلتلي شوية يح وقطعتين فيفاي

وحشربتلي كوب ماي .. وحطيت راسي ورقدت

طبعا … وانا راقد حلمت .. اني كنت ويا الشباب اللي في الرحلة

وكان نسيبي معانا .. وسمعت بعض الاصوات .. كأنهم يستعدّون للطلعه ؟؟ صراحة ما ادري

لكن يوم وعيت من النوم . ؟؟

الله … وين الربع ؟؟

لا صلّيت الفجر .. ولا حد هنيه .. وين ساروا ؟؟

المهم .. دخلت بيت الراحة .. تسبّحت .. وتوضيت .. وصلّيت الفجر

فعقب الصلاة .. سرت ادوّرهم .. لكن ما شفت حد .. اتصلت فيهم ؟؟ ما فيه ارسال عندهم

ما عرفت شو اسوّي .. رحت صوب المطعم … ما شفت حد منهم .. فعقب دقيت بعد مره .. فرد عليه بومحمد .. كلمتين .. وانقطع الخط .. حاولت عقبها اربع مرات اتصل .. لكن ماشي خط؟؟

انتظرت عقبها .. ورديت ادق ،، رن التيلفون .. وقال يدخلون مناطق ما فيها ارسال

وانه فيه حد في الفندق .. ما طلع معاهم .. وهم الان يبعدون من الفندق ساعتين.. في طريقهم إلى نهاية العالم …..   لاااااااااااااااا حرام عليكم .. انا في خاطري اسير هالمكان؟؟

يالله .. قدّر الله وماشاء فعل

بنشوف الصور بعدين

تميت في الفندق،، يلست اكتبلكم شو صارلي في قطر وسالفة المطار

لين ما بدأ الكمبيوتر يفضّي .. فطلّت الشاحن وييت بركلها لكن للاسف .. كهربتهم سويجاتها تختلف .. ثلاث فتخات .. لكن كلها دوئر .. فتذكرت اني يايب شي فيه دوائر .. ركّبته ،، لكن الشاحن نفسه ما رضى يركب .. فتوهقت والبطارية مفضية .. فقلت بسأ حد .. يمكن احصل .. يوم طلعت برع الحجرة .. شفت عامل خدمات الغرف .. فسألته .. وطلّع لي واحد من عنده .. الحمدلله .. وييت برجع الغرفة ..فلقيت واحد من اللي ما طلعوا الرحلة .. فسألته عن شخص فقال هي .. هو راقد فوق … وبسير أوعّيه  .. ورجعت اكمل الكتابة.. لين ما ياني اللي كنت اسأل عنه .. فسلّمت عليه .. ويلسنا نسولف .. وعقبها سرنا اللوبي .. وهو طلب شي ياكله ،،مع ثلاثة من الشباب

بعدين سرنا نتمشى برّع الفندق .. لكن صراحة الأجواء … رووووووعة ما تتفوت

الجو .. بارد .. ومرات اطّيح عليك بعض زخّات المطر الخفيف .. يا سلاااااااام .. جو حلو والمكان بعد حلو . الخضره من حواليك .. واصوات العصافير

نعمه .. نعمه .. الحمدلله على هالنعمه

تمشينا حول الفندق بين بعض المزارع

ويوم رجعنا شفنا كم واحد من الشباب .. يتكاسرون مع راعي ( التك تك ) يبغون يسوقون .. لأنه أشبه بالدراجة .. وخذولهم لفّه في التك تك .. وعقبها انا رجعت الفندق .. اكمّل اللي بديت فيه وهو ( التقرير اليومي او الشبه يومي لرحلتي )

………………

وتابعونا في التقرير الياي … واسمحولي عالإطالة